生日飯@ 灘萬日本料理 Nadaman Japanese Restaurant (Yahoo copy版)


 

來到8月中旬, 試食已經推得就推, 一來個肚真係好大, 隨時生得, 二來媽媽都忙於要食生日飯呀! 

剛過去的週六又推了HD的試食 (雖然其實都有少少心動), 來到九龍香格里拉灘萬同HIM食飯~~
 


還記得2年前陀住Matthew, 生日正日午餐也是來灘萬吃, 不過吃的是港島灘萬 (請參考引用); 相比港島店的開揚靚景, 九龍店的吸引處是較親和及baby-friendly, 當日媽媽也帶了Matthew同行! 

媽媽沿路同Matthew講, 一陣會有飯飯、蛋蛋、肉肉食, 結果為食好動豬一坐底已經超興奮!  


餐廳好細心, 特別為BB準備了暖水; 可惜杯水最終大部分成為Matthew的水塘玩意...... 



媽媽一早o係網上睇定menu, 兩年前試過懷石料理了, 今次由Nadaman Original Lunch中, 揀了雪 Yuki ($360)~~ 先付 (日文的前菜) 當然不及懷石料理的豐富, 只是簡單的沙律~~



不過, 其實我反而好鍾意依款簡單又清新的沙律, 因為所用的菜葉全部好水靈新鮮, 爽嫩清甜, 同上的芝麻汁不會很濃, 但就極為香口, 也為這沙律更添滋味~~~ 


然後又有一小兜莧菜, 以及茶碗蒸, 真好, 前者非常適合孕媽媽食用, 後者就o岩哂Matthew仔!! 



莧菜全部入埋我肚, 覺得依餐打底真係打得好好; 茶碗蒸的質感非常細嫩柔滑, 底層還加了白果、鮮蝦及雞肉來豐富味道, 除了白果及鮮蝦, 幾乎都由為食Matthew包辦了! 



來到正餐部分, 有銀鱈西京漬、牛肉香味燒、御飯及香之物, 相當豐富呢, 好在有大食Matthew! 



我好鍾意食銀鱈西京漬, 不過依度煮得一般咋, 銀鱈魚甜得來唔算好滑好多汁, 聽到Ivan勁讚NOBU的出品, 真係好想搵次去朝聖~~~ 
 


牛肉香味燒煮得相當碎濕濕, 雖然肉味不俗也夠入味, 但食落口感只係麻麻, 最大好處就係適合分享俾Matthew食~~ 同上的南瓜就好香甜美味, 媽媽同Matthew唔客氣食埋Ivan個份, 好滿足! 



其實食乜都係假, 最緊要係撈碗靚米! 當日的御飯其實對成人來講軟稔了些少, 不過就fit哂Matthew了, 撈埋南瓜、牛肉等, 粗略估計佢食得可能比我仲多呢~~ 



無獨有偶, Ivan同文迪都係食雪, 大家口味真係夾!  另外又影下CEO點的花 Hana ($360) 午餐, 牛肉鐵板燒睇黎都幾吸引架, 不過另一主角天婦羅就唔多得~~~

 


Min姐點了香味燒烏冬膳 Komiyaki udon zen ($250), 除了主角的稻庭烏冬, 成品又附上六件裝的卷物 (影時已食了四件, haha ), 結果又益了Matthew~~


為食Matthew「hehe, 多謝姐姐請我食壽司~~~~」 



為食豬的Yummy face~~~ 
 


大家的午餐都有雪糕, 口味選擇勁多包括朱古力、雲尼拿、綠茶、豆腐、芝麻同菠蘿~~ 好在媽媽多口問一問, 原來除了綠茶味係HD出品, 其他全部都係雀巢!! 真係估佢唔到!! 

結果除了CEO堅持點豆腐味, 其他人包括我都點綠茶味, 為食豬當然又食埋一份啦!! 
 

 
其實依餐水準一般啦, 因為九龍店水準的確不及港島店, 不過因為HSBC白金卡的生日禮遇有8折又有2磅蛋糕, 感覺上都抵返D! 嘻嘻, 又有生日蛋糕食, 真係好開心呀~~~ 
 

咁開心的時刻, 當然有來大合照啦, 多謝CEO的靚相~~~~~  
     

另外仲有媽媽同為食 (又眼訓) Matthew的sweet sweet合照~~ 
 
 
Matthew真係好鍾意好鍾意吹蠟燭架!! 帶佢出黎最主要都係想滿足佢~~ 
 


唔係講笑, Matthew真係識吹架! 話咁快, 就吹熄左啦, 叻叻豬~~~ 



好開心的一餐飯, 多謝哂大家~~~~~  雖然, 2磅的蛋糕尚未完成 (真係好大個, 最後打包了一半返屋企啦......), 一班為食甜魔又去了Fine Food再食甜品!! 



早前在晉薈食了日本水蜜桃慕絲餅, 非常難忘, 其實大家都是衝著更多季節限定的和歌山水蜜桃甜品而來! 先試日本水蜜桃啫喱杯 ($38), 由水蜜桃汁做的啫喱, 夾著鮮奶及忌廉做的意大利奶凍, 口味輕柔甜美、清新可人, 再加上面層的超美味juicy水蜜桃, 非常消暑好吃啦! 



日本水蜜桃卷蛋 ($40) 都唔錯, 用上法國忌廉鮮製的卷蛋真係好香又好滑, 口味甜美可人, 不過水蜜桃的清甜味不及原個裝的蛋糕, 又或是啫喱杯突出~~~



又重溫了十分經典的Mango Napolean ($38), 完熟芒果、香甜吉士加上鬆脆的酥皮, 沒有不好吃的道理啦, 為一個下午帶來美好甜美的結尾~~  另因為食豬訓了, 依餐tea食得好輕鬆呢!
 


餐後HIM等人要去美食博覽 (好多人我唔去逼啦.....), 大肚媽媽就推著Matthew, 來到尖東站會合老公, 一家人逛多一會, 夜晚又有另一場生日飯啦!! 真係好肥啊~~~~ 

沒有留言:

發佈留言